19 Jul 2019

NIB Kalaallit Nunaanni mittarfiliortiternernut aningaasaliissaaq

NIB kisalu Kalaallit Airports International A/S Nuummi Ilulissanilu mittarfissuit aningaasalersorneqarnissaannut 450 million koruuninik (EUR 63,3 millioner) taarsigassarsinissaq ukiunilu 20-ini taarsersuinissaq pillugu isumaqatigiissuteqarput.

Nuummi Ilulissanilu mittarfinnik tallililinerit 2023-imi oktoberimi naammassineqartussatut pilersaarutigineqarput. NIB-miit taarsigassarsiat atorlugit aningaasaleeqataaffigineqartussat tassaapput Nuummi mittarfiup 950 meteriniit 2.200 meterinut tallineqarnera, timmisartunik inissiisarfik nutaaq, utaqqisarfik nutaaq kiisalu napasuliaq mitsitsisarfik nutaaq.

Taarsigassarsinikkuttaaq aningaasaliivigineqassaaq Ilulissani mittarfik nutaaq 2.200 meteriusoq, mittarfiup atuuttup tingiartortarfinngortinneqarnera, timmisartunik inissiisarfik iluarsaassisarfillu nutaat, kiisalu napasuliaq mitsitsisarfik nutaaq.

Kalaallit Nunaanni mittarfeqarnikkut aaqqissuussineq nutaaq atorlugu imarpik qulaallugu angallanneq Kangerlussuarmiit Nuummut Ilulissanullu taamaalilluni nuunneqartussanngorpoq. Nuuk Kalaallit Nunaannut isaavinni pingaarnersanngussaaq.

Aningaasaliinikkut Kalaallit Nunaanni mittarfeqarnikkut aaqqissugaaneq ataqatigiinnerusoq pilersinneqassasoq siunertarineqarpoq. Tamanna angallannikkut ataqatigiinnermik pitsaanerusumik pilersitsissaaq, toqqannaartumik timmisartuussinerit timmisartortitseqatigiillu amerlisinneqassallutik, kiisalu angalanerit sivikillillutillu akikillissallutik, kiisalu Kalaallit Nunaata iluani timmisartumik angallannikkut CO2 aniatinneqartoq annikillisinneqassalluni.

“Kalaallit Nunaanni attaveqaatit pingaaruteqarnerpaat amerlineqarpata niuernermi aporfiit ikilisinneqassapput, unammilleqatigiinneq annerulissalluni, aalisarnikkut, aatsitassarsiornikkut, pinngortitamut takornariartitsinikkut ilisimatusarnikkullu aningaasarsiorfissat amerlissallutik,” NIB-ip siulittaasua pisortaalu Henrik Normann oqarpoq.

Kalaallit Airports International A/S-ip Nuummi Ilulissanilu mittarfiit ineriartortillugillu ingerlatissavai. Namminersorlutik Oqartussat suliffeqarfiup 66,67%-ianik piginnittuussapput, kiisalu Danskit Naalagaaffiat sinneruttunik 33,33%-inik piginnittuussalluni.

NIB nunat tamalaat akornanni aningaasaliisarfiuvoq nunanit ilaasortaasunit arfineq-pingasunit pigineqartoq, tassa ukunannga: Danmark, Estland, Finland, Island, Letland, Litauen, Norge aamma Sverige. Aningaaserivimmiit aningaasaliiffigineqartarput suliniutit namminersortunit pisortanillu nunanit ilaasortaasuni taakkulu avataanni ingerlanneqartut. NIB akiliisinnaassusilerujussuuvoq (AAA/Aaa), kiisalu tutsuuiginassusermik uuttortaasartunit Standard & Poor’s and Moody’s-imit qaffasissorujussuarmik tutsuuiginassuseqartutut naliligaasimalluni.

Sukumiinerusumik paasisaqarumaguit attavigiuk

Hr. Søren Kjær Mortensen, Pisortaaneq, Originationip siuttua, oqarasuaatikkut: +358 10 618 0249, soren.mortensen@nib.int 

Hr. Arild Moen, Attaveqarnermi aqutsisoq, oqarasuaatikkut: +358 10 618 0496, arild.moen@nib.int